BE 234 O JESUS TATAP MA TUSON
Versi Version 1
1
Di rumang ni portibi on
Sai tong do lilu rohangkon
Hujujur hatigoranki
Hupangasahon burjungki
2
Dung na hutatap Tuhanki
Hutanda hahuranganki
Lam tu balgana i antong
Ai lam huboto dangolhon.
3
Hurangan au di sasude
Sipangasahononhon i
Na so barani rohangkon
Manaringoti diringkon.
4
Marhahurangan saluhut
Sap dosa do sude huhut
Ndang na manahan rohangki
Di jolo ni Debatangki
5
Na gabe tunduk nama au
Tu Tuhan Jesus do au lao
Naung mate Ho di Golgata
PadoMu au tu Debata.
6
Di tingki ni Tuhanta i
Do songgop hatiuron i
Mulai mauas rohangkon
Tarsunggul do hot rohangkon
7
Huhalungunhon Hata ni
Tuhanku Sipangolu i
Na hubege sai hutohoi
Mardongan Tuhan huoloi.
8
Haimbaruon do soluk
Tu halumlamon na so tuk
Mardame do huhilala
Dibaen Jesusku, Debata.
9
Jesusku hatigoranki
Sasada Ho paheanki
Saleleng au di tano on
Nang dung marujung ngolungkon.
10
Ndang na tarhirim au disi
Saleleng ni lelengna i
Asal ngolungkon situtu
Tung Ho, Tuhanku na burju.

Last updated: 2026-03-30
Buku Ende (c) Huria Kristen Batak Protestan

OK
© 2010–2026 Tim Alkitab © 2010–2026 Quick Bible Team
Python 3.12.12 | production